Features

Brokeback na Broadband

‘Brokeback’ imbes na ‘broadband’ ang nasasabi ni Mike (hindi niya tunay na pangalan) kapag pinag-uusapan ang pamoso at maanomalyang ZTE-NBN deal. Nabigyan kasi ng malisya noong una ang relasyon nina dating NEDA director Romulo Neri at Philippine Forest Corporation CEO Rodolfo “Jun” Lozada Jr. nang mabanggit nila na pareho silang nag-aalala sa isa’t isa. Pawang propesyonal na ugnayan lang naman daw ang meron silang dalawa, paglilinaw ni Lozada, kaya malayo ito sa kung ano man ang meron sina Jack Twist at Ennis del Mar.

Pero tulad ng gabi kung kailan ginapang ni Jack si Ennis sa Brokeback Mountain, sadyang nababalutan ng hiwaga ang proyektong sinasabing nagtutulak na mapaunlad ang kakayahan sa komunikasyon ng gobyerno.

Maraming isyu ang naungkat dahil sa ZTE-NBN deal. Kailangan ba talaga ng ganitong proyekto? Bakit sobrang taas ng presyo? May naibulsa nga ba ang ilang tao ng pamahalaan? Ilan lamang iyan sa mga tanong na umaaligid sa usaping ito.

Mahabang usapin sa kung paano nagsimulang makialam ang taong bayan tungkol sa ZTE-NBN deal, pero isa ang alam ng tao: kailangan nilang malaman ang katotohanan.

Modernisasyon.

Iyan ang nais patunguhan ng programang National Broadband Network. Iyan din daw ang nakikitang patutunguhan ng mga iprastrakturang itinatayo sa dating bakante na 37-hektaryang lupang pagmamay-ari ng Unibersidad ng Pilipinas sa Commonwealth Ave.

Matindi ang pagkondena ng ilang sector ng lipunan sa mga relasyong tulad ng kay Jack and Ennis sa Brokeback: relasyong bakla. Tila ganito rin katindi ang pagkontra ng mga grupo sa Unibersidad ng Pilipinas sa UP North Science and Technology Park (NSTP).

Ang UP NSTP ay isang kasunduan ng UP at Ayala Land Incorporated (ALI). Mula dito inaasahang makasabay ang paniniliksik ng UP sa antas ng ibang unibersidad sa labas ng bansa at matugunan ang pangangailangang pinansyal ng pamantasan. Inaasahan din na makakalikha ito ng napakaraming trabaho.

Pero para sa ilang grupo, mas makakabuti kung igigiit ng unibersidad ang mas mataas na subsidiya mula sa pamahalaan, kaysa sa umasa ito sa mga pribadong korporasyon. Ikinakabahala rin na baka maging komersyalisado ang mga pananaliksik na magagawa sa NSTP.

ZTE-NBN deal at UP North Science and Technology Park. Dalawang proyektong parehong may hangarin tungo sa modernisasyon, pero bawat isa ay may isyung kinakaharap. Hinihintay ng taumbayan ang mga mangyayari sa pagdinig ng senado sa kasunduang pinasok ng gobyerno, habang inaabangan naman kung talagang makakabuti sa unibersidad ang NSTP sa oras na matapos ang konstruksyon at magsimula na ang pamamalakad nito.

Makakabuti sana ang mga proyektong nabanggit kung mga tapat na tao ang nasa likod ng mga ito. Mas magiging maayos ang lahat kung nakatuon ang mga ito para sa mga paglilingkuran at hindi ang mga naglilingkod ang tanging makikinabang.

Dapat lang na makialam ang mga tao , hindi lang sa dalawang proyektong ito kundi pati rin sa iba pang transaksyong pinapasok ng pamahalaan at pamantasan. Ito'y upang hindi basta mapagsamantalahan ang mga inosente ng mga taong may tinatagong layunin. Sino bang gustong maloko at bigla na lang tirahin habang walang kamalay-malay na nakatalikod?